Muxuu Madaxweyne Farmaajo u saxiixi waayey xukunka toogashada ah ee Dilaagii Wasiir Siraaje?

0
7

Hadii aynaan cadaalad jirin, nabad ma jiri kartaa? Seddex sano ka hor abaarihii 7da fiidnimo maanta oo kale, waxaa si bareer ah loogu toogtay agagaarka madaxtooyada walaalkeey oo aan jeclaa Cabbaas Hajji Abdullahi Sheikh Siraji.

Ninkii toogtay iyo masuulkii la socday waxay isku dayeen in ay goobta ka baxsadaan balse waa la qabtay. Taariiqda marka ay aheyd 14th June 2017 waxa ay maxkamada ciidamada Qalabka Sidda u fariisatay dacwadii dilkii marxuumka. Taariiqdu marka ay aheyd 19th June 2017 waxa ay Maxkamada Ciidamada Qalabka Sidda darajadeeda koowaad ku xukuntay gacan ku dhiigle Ahmed Abdullahi Ahmed (Caydiid) dil toogasho ah.

Culeys walbo oo jiro, halkaas waxaa ka muuqato in ay jirto Rajo dowladnimo iyo Garsoor shaqadiisii si cadaalad kujirto u qabsaday.Hasi ahaato, Garsoorka markuu gaaro go’aan sida qisaas ama dil toogasho, waxaa loo Gudbiyaa madaxweeynaha si uu u ogolaado kadibna qisaastii loo fuliyo cadaaldiina ku idlaato.

Madaxweeynaha oo aanan saxiixin go’aanka maxkamada lama fulin karo. Madaxweeynaha marka loo geeyo go’aanka maxakamada waxaa u banaan:

1. Inuu sida loogu keenay go’aanka la qaato oo uu saxiixo qisaastiina sidaas lagu fuliyo

2. In maxkamada uu dib ugu celiyo oo uu faro in baaris dheeri ah la sameeyo- waa hadii ay jirto sabab kalifeeyso. Caadiyan go’aankaan waa in madaxweynaha ku qaato mudo 14 maalmood gudahood ah.

  • Madaxweyne Farmaajo oo laga dalbaday saxiixa toogashada Dableygii dilay Wasiir Cabaas

Waxaa kasoo wareegtay in ka badan laba sano iyo bar maalinkii maxkammadda go’aan ka qaadatay welina madaxweynaha go’aankii maxkamada ma sixiixin. Midaas oo ka dhigeyso hankii Garsoorka iyo cadaalada aan ka laheyn mid dhicisoobay.

Waxaan madaxweeynaha aniga iyo isaga kawada fariisanay oo kawada hadalnay in cadaalad loo helo Marxuum Abass in ka badan 10 jeer mar walbana kulankeenu wuxuu kusoo dhamaanaayay “waa balan ninkii Abass dilay cadaalada ayu marayaa.” Ilaa hadda wax natiijo ah malahan.

Marka, waxaan hada la yaabanahay in la gaaray waqtigii la raadin lahaa qaabkii kale cadaalada loogu heli lahaa Marxuum Abass. Hadii xamar ay dishay Abass hadana caddaalad looga waayay, maxaa diidaayo in lafahiisa lasoo faago laguna xabaalo tuuladii uu ku dhashay oo ay awoowyadiis ku xabaalnaayeen?.

Mudane madaxweyne qoyskii Abass waxa ay rabaan cadaalad, hadii cadaalad aysan jirine ma dhici kareeyso in nabad iyo dowladnimo dhalato. Fadlan arinkaan ka cadaalad fal!

LEAVE A REPLY

Please enter your comment!
Please enter your name here